दापोली प्रतिनिधी
दापोली तालुक्यात वाकवली येथील हायस्कूलमध्ये एस.एस.सी मार्च 1997-98 च्या बॅचमधील विद्यार्थ्यांनी माजी विद्यार्थी स्नेह मेळाव्याचा आयोजन केला होता. याप्रसंगी सर्वप्रथम श्री स्वामी विवेकानंद शिक्षण संस्थेचे संस्थापक संकल्पक शिक्षण महर्षी डॉ. बापूजी साळुंखे यांच्या अर्धपुतळ्याचे पूजन करून तसेच महाराष्ट्राचे आराध्य दैवत श्री छत्रपती शिवाजी महाराज व विद्येचे दैवत सरस्वती यांच्या प्रतिमा पूजनाने व दीप प्रज्वलनाने झाली. तब्बल 27 वर्षानंतर शाळा माऊलीला भेटीचा व आपल्या वर्ग सवंगडीना भेटण्याचा आनंद माजी विद्यार्थ्यांच्या चेहऱ्यावर ओसंडून वाहत होता. याप्रसंगी विद्यालयातील सर्व गुरुदेव कार्यकर्त्यांचा व शिक्षकेतर सेवकांचा पुष्पगुच्छ देऊन सन्मान करण्यात आला. माजी विद्यार्थ्यांनी आपली मनोगते व्यक्त केली व शाळेतील गतस्मृतींना उजाळा दिला. शालेय व्यवस्थापन समितीचे अध्यक्ष सूर्यकांत जाधव व मिलिंद धुमाळ यांनी हा मेळावा पार पाडण्यासाठी मोलाचे सहकार्य केले होते. या बॅच कडून विद्यालयास संगणक संच व कलर प्रिंटर देण्याचे मान्य केले. शेवटी अल्पोपहार व चहापानानंतर कार्यक्रमाचा समारोप झाला. कार्यक्रमाचे सूत्रसंचालन मिलिंद धुमाळ यांनी केले होते.
